ملامح الود بانت في نواظرنا

والصبر ينهى الملامح كل ما بانت

يا لاهب الشوق لاتبحث سرايرنا

لا صار عيّت ظروف الوقت ما زانت

غيّم علينا ولا تعمي بصايرنا

ونْضيع والناس ياما قبلنا عانت

عسى المقابيل من بكره تسايرنا

تصفى مشاريبنا من عقب ماشانت

ونصافح الصبر ونودّع عبايرنا

ونكتب على جْدار غربة عمرنا هانت

وتمطر سمانا وتستسقي ضمايرنا

من غيمةٍ ما بعد صارت ولاكانت

ونسوق في لحظة اللقيا بشايرنا

وغصون الأشجار لاجاها المطر لانت

نحْلم ونَحْلم ويتعب فكر حايرنا

وأحكام الايام لو ماودّنا! مانت

يا صالي البعد لا تحرق ستايرنا

تكشف خفايا صْدورٍ للغلى صانت

ليت المقادير لو مره تْخيّرنا

ونْمتّع العمر لا من فرصته حانت