لا ضاق صدرك لا تحرى من الناس

ما أحدٍ يفيدك لا ارتفع ضغط دمّك

حاول تعدا كل ما يشغل الراس

حتى لو أنه في حياتك يهمّك

لا تندفع ويشتتك كل هوجاس

والشوف لا يقصر على حد كمّك

ابعد عن اللي ماله شعور واحساس

لو يمدحك بكره يروح ويذمّك

مالك وراه الا المتاعب والاتعاس

اما تتمه بالحياة او يتمّك

خذ للزمن من صفحة الطيب نبراس

واحذر عواصيف الدهر لا تلمّك

مشاكل الدنيا بلا حد واقياس

عنها تصد وغصب تلتف يمّك

لابد ما تشرب من امرارها كاس

واما صبرت الكاس الآخر يسمّك

ثبت مباديك الكريمة على ساس

قبل غرابيل الليالي تضمّك

اتبع رضا ربك ولا يلحقك باس

وترى رضا الله من رضا ابوك وامّك

لا تبني آمالك على ساحل الياس

اطلب كريم الوجه ويزول همّك