من طاح من عين الغلا وش أبي به
حتى ولو ساق الهدايا معاذير
يرحل عسى في يوم يلقى نصيبه
واللي حصل باسباب ذيك المقادير
مات الغلا مابقي غير طيبه
مع ذكريات أمسه وبعض التعابير
أدري جروح البعد تبقى عطيبه
صورة ألم فاقت حدود التصاوير
وأدري أن التجاهل مصيبه
في حق قلب بالوفاء يشكي الغير
ما أقول أنا إلا وربي غريبه
الود غاب الود من دون تقدير
وكل مع الأيام يسأل طبيبه
وقلب غزاه الهم يحتاج تحرير
ومن طاح من عين الغلا وش أبي به
خلاص يكفي لا يسوق المعاذير
الشاعر -فهيد البقعاوي
