الليلة أنفاسي تدور على أنفاسي

زلة حنينٍ تجيب العلم وتخابر

حاولت أغالب صياح الشوق بنعاسي

وصورتك لأعماقي اللي تشبهك سابر

إن قلت ناسيك والله ماني بناسي

لو خطوة البعد وقّف دونها الشابر

يا صاحبي يا وجودي يا غلا ناسي

لا تحسب أنّك فقط في دنيتي عابر

مركب غرامك على مينا الهوى راسي

وآذود عنّه رياح الغدر وآثابر

لني عرفت الهوى مع طولة مراسي

لو ينكسر.. ما لكسر قلوبنا جابر

طبع الوفا في دمي رغم أني أقاسي

طبعٍ من الله وترثة كابر وكابر

طالبك لا تختبر باسم الوفا باسي

الشك لا ثار شين ويقطع الدابر

لا تنخدع، فيك ما يخدعني إحساسي

منت بمثل ما فؤادي من سنه خابر

مدري هو الحظ ولا طبعنا قاسي

أيامنا تشتعل ونشوف ونكابر

ومهما جرى دبره المولى على رأسي

بصبر عسى الله يفرّجها على الصابر