الليالي مشاكلها عراضٍ طوالي

للنفوس الشقيّه والنفوس السعيده

غارةٍ عن يمين وغارةٍ عن شمالي

توهمك بالهدوء وعاصفتها شديده

يا وجودي على الراحة ويا وجد حالي

ليت مالي مع الشعّار ولا نشيده

هب يا هالزمان اللي غزاني لحالي

كل يومٍ على الهاتف يجيني قصيده

ذي معاتب حبيب وذي مشاريه غالي

وذي تخفّض من السكَّر وهاذي تزيده

والعرب علمهم بي يوم صدري شمالي

والليالي ما قفّت به.. لا يمكن تعيده

روّحت مع مهب الريح يا همّلالي

ما أحدٍ جت له الدنيا على ما يريده

والتجارب عطتنا ميزة الاحتمالي

ودرّستنا مشاوير الحياة البعيده

ان ما به حياة إلا وراها زوالي

والبنادم بها لدنيا شبوحه بعيده

مير ماهيب لا مكسب ولا راس مالي

كود من حط قولة والنعم في رصيده

وطاب عند البعيد وطاب عند الموالي

وله نصيب الأسد من الخصال الحميده

وان تثنّت عزوم مشوربين العيالي

عزمه أقوى من ظروف الحياة العنيده