نايفات المراقيب

أمس الضحى عديت في راس نايف

بمهايفِ من نايفات المراقيب

رقيت فيه ومنه حولت عايف

عمسِ وكن الكبد فيها اللواهيب

حولت ما حصلت غير الحسايف

وشيّب بي الهاجوس قدام لاشيب

من واهجٍ لاجي وأنا منه خايف

لاجِ يلوج وخايف منه ماأطيب

هم على ثومة ضميري مسايف

من بعد فرقى لابة تدرك الطيب

عنهم نحنّي موميات السفايف

ويابعدهم من دونهم يقنب الذيب

وياما زمالي دونهم من مهايف

من درب دوّ يتعب الهجن وتعيب

ليت الحمام اللي بريشه خفايف

يوصل سلامي يم ربعي وترحيب

ياحسين يامشكاي ويش أنت شايف

من العام منكم مايجيني مكاتيب

ولاطارش شفته علومه طرايف

عنكم يعلمني بما صار وأطيب

ياحامي المظلوم وأن صار خايف

وياريف ضيفه والليالي شلاهيب

- محمد بن سعد العضيدان