ويلاه

الله من قلبٍ تعذَّبْ بدنياه

والله من عينٍ بكت من قهرها

ما ينفع المجروح ترديد ويلاه

وما ينفع العاشق مسامر قمرها

لو من شكى تسمع له الناس شكواه

ما لاج في نفسي عذابٍ دمرها

مير البلا اللِّي ناقلٍ داه برداه

يشيل همْ النفس ويَّا قهرها

أزرى يلاقي له شريك ببلواه

يشاركه هم العيون وسهرها

يخاف من هرج العواذل ويدراه

يضحك وروحه ما يبين كدرها

وإلى تخلوت به همومه تحداه

تلعب به أمواج بغبة بحرها

والقلب تاه وتاهت النفس وياه

في مركب الأحزان تعلن سفرها

يشكي زمانه والمقادير تبراه

نفسه من اهمومه سريعٍ خطرها

ما له رفيقٍ يشتكي له وينخاه

ما له سوى منشي السحاب ومطرها

- الشاعرة/ أغاريد السعودية