شبّاك بيتك

اشتاق لك واليا احتدم فيني الشوق

تسرقني الخطوة لشباك بيتك

يدله بها قلبي ويسعد بها الموق

لو إني اقبل وانصرف ما لقيتك

واليا عوى ذيب الوله ساقني سوق

يمك ولولا الناس جيت ودعيتك

يامن فهقتي بالغلا.. كل مخلوق

في ذمتي لا انسى هلي مانسيتك

حبك تشربني شرايين وعروق

اجيك ضامي واشربك ما ارتويتك

واحن لك حنة خلوجٍ مع النوق

على ولدها وارفع الصوت ليتك

ليتك تروّق جو الاحباب وتروق

وتعطيني حقوقي مثل ما عطيتك

ما هوب حق تردها طاق مطبوق

وتجزان بالسيّة وانا ما جزيتك

- علي السحيباني