Sunday 29/12/2013 Issue 15067 الأحد 26 صفر 1435 العدد

بصمة ناعمة

يا نوف انا وياك ما نعرف النوم

النوم نعمة مونسين الحبايب

لنا السهر للفجر والفجر موشوم

منّا بجفن ٍ جفلّه زول غايب

جفن ٍ ركز به عود ما يقبل السوم

من غفوة ٍ في كحلها النجم ذايب

يعصى على الغفوه وعيّا على اللوم

يرجي نهار الله والصبر طايب

من حوله الهالات سودا وموصوم

في بصمة السهر الطويل النشايب

نسهر سهر خايف على قلبه هموم

يجفل إذا هزّت مساه الهبايب

غاب الونيس وحضرت اطياف وحلوم

كثر الوحى يا نوف مخطي وصايب

ما بين سمع وشوف هقوات وعلوم

تكثر على القلب الجزوع السبايب

يا عمري الانسان لا صار موهوم

يصبح من ظلاله إذا لدّ هايب

معلوم ما تامن من البعد معلوم

نفس الحزين اللي وحيد القرايب

وحيد ما تقمر عقب عينه نجوم

النور نوره ،عقبه الشوف خايب

الشوف من بعده على العين ملطوم

يا زول ٍ الازوال عقبه حرايب

متى عيونه بس تهدي لنا النوم

لا نورّت ليل ٍ يتيم الحبايب

- ريمية