التوجد والتمني

آه من قلب هواجيسه تلوفه

مع همومه كل ما اقفن واقبلني

لاذكرت اللي زها الحنا كفوفه

يالطيف الحال طار النوم عني

ليت عيني وان بغت شوفه تشوفه

كود قلبي يستريح ويرجهني

حيث عيني عن هوى غيره عيوفة

ماتبي غيره لو انه غاب عني

والله اني طحت في حال المروفة حيلتي كثر التوجد والتمني

ماذبحني كود من تذبح وصوفه

من جميع البيض حبه ممتحني

عنز ريم مابعد رامت اخشوفه

قايده للصيد ترعى كل فني

والجوازي كنها معها معسوفة

يوم تجفل كلبوهن يجفلني

هرجة العشاق يازين معروفة

والغلا باقصى الضماير مستكني

الهوى مثل المغازي والنكوفة

والقصيدة من سمع فيها يغني

القمر يظلم الى بين كسوفه

لاتبين للعرب ظنك وظني

لازم راعي الهوى تكثر صدوفه

لو يطولن الليال او يقصرني

والمعافى ملحق الدنيا حسوفة

ماطعنه اللي من الفرقا طعني

لو تروح الروح للزين مخلوفة

والعذارى يبعدن او يقربني

- احمد الناصر الشايع