غلطة سنيني

توك تعرف الحب توك تجيني

توك تذوق المر ياكبر ذنبك

بعت الهوى وشلون ترجع تبيني

وقلبي جريح الحب من ظيم قلبك

ذقت العذاب الوان شوق وحنيني

عسى يداري الحال ربي وربك

طالت ليالي هم تسهر بعيني

واسأل نجوم الليل عن تالي دربك

تدري الغرام احساس بينك وبيني

خنته قبل ما تخون قلب يحبك

بيدك قتلت الحب والحب فيني

حتى الوفاء مجروح ينزف بقربك

لا لاتجي وتعود برفع يديني

واحلف برب البيت ما عاد احبك

حبك بعد ماكان غلطه سنيني

خلك تذوق المر ياكبر ذنبك

- وليد الناصر