أنا الظبي وأنا العيون الناهبة
جدّلتْ أسراب الهوى في خاطري يا صويحبي
جدّلتها... بعد انطلاقة... عابثة متمرّدة
حتى تشوف بأم عين.. ان الهوى صنعة ظبي
لو شايفك أو شا.. يقيّدْه.. بلحاظ مسددّه
هذا الغلا بيدي ولو هو في ضميري محْتبي
بانزع ضميري يالغلا... أو من غلاك اجرّده
ايه اعترفلك ان قلبي من غروري يجْتبي
بعض الدلع... بعض العناد.. وشي صعب احدّده!
وان جيت احدد فلسفة طبعي تحيير مطلبي
أنقى جموح من الخصال... ولو تزيد أزيّده
جذر السمو اللي تشرب من معينه منقبي
هاماته ابْصدر الفضا... متفرّده... متسيّده
يا صويحبي انا كذا.. طبعي يحدد مذهبي
تامن بهذا أو تبي بعض الشروح مفنّده
ويحي إذا سلّمت لك قلبي وانا فنّي السبي
كل احتمالات السبي للطرف جات مجنّدة!!
يا ساكن غرورك أنا فوق الأماني... كوكبي
انا السما وأنا البروق الممطرة المتجدّده
انا الظبي.... وأنا العيون الناهبة.. في بوظبي
أرثى لها كل القلوب اللي بْطرفي مبدّده!!
- عبير البريكي
