ودي أصيح

لا تكتبيني غيم تمسحني الريح

ولا ترسميني مركب انسى الشواطي

يامن هدب عينك لقلبي مراجيح

وأفرش تحتها عن جبينك بساطي

أمشي وانا اللي لو تعثرتي اطيح

وهي لك حروفي بس خلي نقاطي

ياكثر بيباني وقل المفاتيح

ولانيب حتى لو أبي البعد ساطي

وينك تعبت اسأل عن النرجس الشيح

وينك تعلّت قاع والسقف واطي

فكي ازارير الحكي ودي أصيح

لاشك أخاف يشق صوتي خياطي

وان قلت احبك واجمل الحب تلميح

مافك سجان المحبه رباطي

كذا كذا نامت عيون المجاريح

كذا ابتدا بك يالجروح ارتباطي

ولا تكتبيني غيم تشربني الريح

ولا ترسميني مركب اظما شواطي

- عبد المحسن بن سعيد