من الراس للراس

أنا صديق الطيبين المناعير

اللي لهم كسب المعالي عشاقه

حضر وبدو نطاحه الشر والخير

صادقتهم وأخذت منهم صداقه

حلالة المشكل كبار المخاسير

ياسعد منهم له عضود ورفاقه

زبن المخيف إلى رمته المقادير

بالجاه والا المال والا الحماقه

وأخذ من أرياهم قوي المشاوير

والطيبه ماهيب منهم شفاقه

- عبد الله اللويحان

* * *

ترى الولد ما يظهره غير يمناه

عزم وجزم وتصير كبده متينة

لا وفقه جزل العطايا ومشاه

نال العلا في همته من يمينه

والصدق بين الناس ماله ملاداه

ويكمّل الرجال يا طاب دينه

تشوف كل اللي حواليه تدراه

حشمة وتقديرٍ وربه يعينه

- سالم بن تويم

* * *

دنياك لا تخفض جناحك عليها

الا لبر الوالدين بتفانيك

نفسك رضا الله من رضا والديها

مرضاتهم شفاعتك يوم تدعيك

لا تطلب الجنه ولا تحتريها

ان ما بدت من والدينك حسانيك

واعرف عيالك لو تجملت فيها

فعلك بشيبانك، يجي فعلها فيك

- فالح الظفيري