لاتامن بوقتك

ياصاحبي مدري وش اللي جرالك

كنك بطاقة كل من جاك يشحنك

اسمع جوابي يوم جاني سوالك

اعرفك بالماضي على الطيب ديدنك

ما جيت يمك طالباً من حلالك

ويعنك ماجيتك وابي شي يعنك

من لا يقدر جيتك ما عنالك

ومن لا تحسه ضيقتك مانشد عنك

ومن لا تهمه فزعتك ماشكالك

ومن لا وثق في حنكتك ماخذا منك

ومن لا وقف في غيبتك دون حالك

عده عدو ولا تحطه على ايمنك

ومن لا حكى في سيرتك ما حكالك

ومن لا عرفك اكيد جاهل بمعدنك

ومن لا وفاء بأهل الوفاء موفالك

ومنهو طعن غيرك بغدره بيطعنك

ولا تامن بوقتك لو انه صفالك

لابد لك ساعه تفاجئك تحزنك

وان كان قاصر دون وجهك ريالك

رجع ريالك واحفظه داخل البنك

وريح ملايكتك وعقل اجمالك

فعلك فقط بين النشامى يثمنك

اخلقت فالدنيا وحيد لحالك

وان مت ما تدري من اللي بيدفنك

- ممدوح البدراني