صوت وصدى

أمس العصر عالي المرقاب شرفته

لانيب طربٍ ولالي حاجة فوقه

لكن من ضيقة في البال والفته

آدله القلب لين انتل معلوقه

وفوقه تذكرت بن فراج واخترته

اللي بصرف الجواهر حامي سوقه

نوادر الشعر عاشقها وعاشقته

يجنيه جني الثمر من زاهي عذوقه

يامسفر القلب عذبني وعذبته

عيا يوالف زمان كاثر بوقه

لاقلت ياقلب جاملني وجاملته

عيا على منهجه لا ول وطاروقه

كم مجلس جيت عاني له وجنبته

لو ان كبدي على المجلاس محروقة

لاشفت بعض الاوادم فيه ماطقته

الجاهل اللي لسانه يضرب شدوقه

متشيخ في مساكين مزعمته

زعامة بين عارية ومسروقة

لو ان بعض العرب يبقى على سمته

حافظ على مستواه وحفظت حقوقه

الرجل مادام صامت جمله صمته

ولاحدٍ درى عنه ويش اللي بصندوقه

واليا تكلم معك لحظة وكلمته

حددت شخصيته لاوحيت منطوقه

وتزداد به معرفة لامنك جربته

في موقف يرجع الرجال لعموقه

هذي معاناة قلب شام من وقته

ماهي توجاد معشوق لمعشوقه

وصلاة ربي نهاية كل ماقلته

على النبي عد نو ناضت بروقه

- محمد بن عباد السلولي

* * *

يالله ياللي خلقت آدم وصورته

ومكونه لين سار الدم بعروقه

ياخالق الكون من لاشي كونته

ومسيرٍ السحاب وبامرك تسوقه

تفرج لعينٍ لذيذ النوم عايفته

كثير الاوقات حلو النوم مااذوقه

واللي جبرني على مااخفيت واعلنته

رسالةٍ شرحها وافي ومرفوقه

من شاعر خاطري طربٍ لسالفته

ورسالة اللي مابيه آقول ملحوقة

اللي تشوفه يابن عباد قد شفته

باسبابهم شف عباة الناس مشقوقة

بعض الرجاجيل نطقه قد معرفته

وتروح مستامنه في علم ويبوقه

تلقاه مع شلة دايم موالفته

على علوم الردا ماهيب مسبوقة

يزعم بروح على ماشٍ مزايمته

مغير لمروجين الهرج ماسوقه

مجالس الطيب عايفها وعايفته

عساه مرواح طير قطعت سبوقه

واقبل تحيات من بالرد كلفته

على مجاراة مثلك زايدٍ شوقه

ياللي ماخليت شي ماتطرقته

سوالفٍ من مصادر ناس موثوقة

وصلاة ربي عدد مازاف من نبته

في مرتعٍ عقب سيله زاف زملوقه

على النبي عد ماتقرا وغيبته

وعدادماكل عود شرب بعروقه

- مسفر بن فراج الأكلبي