سـادي

بعد ماطال الظلال وحلت العصريه

واستوى لي الجو في سفح الجبل والوادي

واستخال البارق اللي يشعل الوسميه

واستكن الطير بغصون الشجر هجّادي

هب نسناس البراد وناوي بي نيه

يلسع اطراف الكفوف الين ناش فوادي

شب ضوٍ يصطلي البارد على صاليه

ويستهيض الهجس لين الشعر له ينقادي

ريح جمره مع هبوب النود مابه زيه

لا تخالط كبر جمره واللهب يزدادي

ودلة الرسلان فيها القهوة البريه

وهيلها يقلب على جمر الغضا الوقادي

بعد ما شافت عيوني اللوحة السحريه

من جمال آبها ومن نفحة زهور الكادي

ان بغيت الهيجنه هيجن على طاريّه

وان بغيت الحدي غنى فوق رجم بادي

ينسكب لك تبر حرف وللجزل ماريّه

يفرق من الهزل وإلا من شبيه العادي

صادق احساسه يداعب ضايق النفسيه

لاتغنى به رخيم الصوت لحنٍ هادي

ويتراقص له مشاعر فاقد الحنيه

يعزف اوتار الحنين لمن خليله غادي

وتشرح احوال الكتوم اللي بقلبه كيه

عذبته الضيقه اللي طبعها به (سادي)

- شواهق نجد