صالح الشادي

في رحاب العز اعدي يا الفرس

واطربينا بالجموح وبالصهيل

واعبري فينا الى اخر نفس

ولين نقهرها حدود المستحيل

يا السعودية ترى عشقك هوس

وحبنا لترابك انهار تسيل

وكلنا من دونك جنود وعسس

نفتديك وبالوغى نشفي الغليل

اجلسي يا اعز واغلى من جلس

فوق عرش الارض بالطود الطويل

وصحِيّ العالم اذا جاه النعس

واشعلي للخير قنديل وفتيل

شعبك اللي بدارة معزي درس

لو طفى هالشمس بعزومه قليل

جيل شاد وجيل بالبيدا غرس

وجيل ماله فوق هالكوكب عديل

تحت راية من طوى المجد ولبس

تاج مُلك مرصعٍّ باللامثيل

خادم الاسلام مصباح الغلس

حاكم الحكام والصّلت الصقيل

الحميم اللي ليا منه همس

لبت حشود الدياجي والاصيل

والعديم اللي ليا منه عبس

طاح اشد اعدا الحمى حدره ذليل

وفي ذرا اللي عمّر صروح وطمس

كل جهْل وكل ضحْل وكل ميل

وطهّر ثياب العفاف من الدنس

وعقّل المرجوج عقله والهبيل

منهو غيره للمواقف للدمس؟

منهو غير محمد الحر الأصيل

ذا وفيّ العهد، وهي كلمة وبس

هو زعيم الشرق وافعاله دليل

واصلي يا الدار وحنا لك حرس

وكلنا في وادي احساسك نخيل

ولا علينا بالرخوم وبالنجس

وبالبغيض وبالمريض وبالهزيل

من يعادينا تردى وانتكس

ومن يسالمنا له الظل الظليل

ومن تناسى الحق نقرع له جرس

وعن سراط الحق لا يمكن نميل