يا كبر فرحنا بذكرى مية عام
عن قصة فيها كتبت كل الاقلام
قصة على صدر التواريخ مرسام
عبر السنين وفي جميع المجالات
قصة بها حارت جميع التعابير
وتشعبت فيها جميع التفاكير
حيث انها فاقت جميع التصاوير
عن كل قصة صورتها الروايات
قصة بها يعز كل السعودي
عند العرب والفخر فيها يزودي
قصة تسولفها جميع الجدودي
عبر الزمن كن البطل حي ما مات
والسالفة فجرا ظهر خمسة شوال
على الجزيرة وبدل الحال من حال
فجرا جلى ليل من الله مرسال
عبد العزيز الفجر فر المسرات
السالفه هي سالفة يوم توحيد
ارض الجزيرة ولبست ثوب جديد
ثوب زهاها بصاحب العيد والعيد
يوم لفاها بالسيوف المحنات
هلت وفرحت يوم حول صقرها
على متنها وفي يمينه مهرها
السيف وكتاب بحكمه نصرها
كتاب بين الخلق حكمه مساوات
حول عليها قبل ما الشمس تشرق
فارد جناحه والمخاليب تبرق
وخلا العدو يذعر وبريق يشرق
ويصيح بأعلى الصوت هيهات هيهات
ركض يبي المصمك يبي يحتمي به
عن طير حول ساعة ما هقي به
مع اربعين كل منهم صحيبه
على كتاب الله ووقت الملاقات
وما عاقت قلاع القصر طير حوران
يوم احتمى فيها عدوه بخذلان
فكر يبي يزبن لقا موت خيطان
رجال لجل الله لها الموت مشهات
ومن فوق مشراف القصر صاحوا لله
حكم الوطن ثم لقرم يدله
عبد العزيز القرم وهذا محله
ما غير اخو نوره رفيع المقامات
وعادت رياض العز للعز بالسيف
اللي يطيع كتاب ما فيه تحريف
كتاب في حكمه عداله وتنصيف
لكل مظلوم ولا به محابات
ومن يعتزي بالله كبر فيه صبره
مثل الشجاع اللي لقا منه نصره
سبحان رب بين نظره ونظره
غير على العدوان في ظرف ساعات
وعبد العزيز اللي توكل بربه
ما خاب ظنه وسهل الله دربه
وخلا يدينه بقوة الشرع صلبه
ما تنثني عند العدو دوم صلبات
وماسد ابو تركي رياض حكمها
يوم سمع ديار تمشي بظلمها
شد الحال بقوة الله هزمها
وتلا كتاب الله بجميل العبارات
جهز على نجد الكبيرة بخيله
ورجال من وقف لها عزتي له
بأمر الاله وزاد حكمه حصيله
ديار تفرقها بعيد المسافات
وعود على شرق شرق فيه نوره
مثل شعاع الشمس واعلن حضوره
وكل صغى لأمره ورايه وشوره
على كتاب الله ولا به خيارات
وشده شذا وردة نسيم الجنوبي
واصبح بها وقالت ابهديك ثوبي
حيثك لجل ربك بتغسل ذنوبي
وينسى خضار الارض بالحق ما فات
وامره ربي يتجه لاطيب الارض
مكة وطيبه وضمها طولها وعرض
ودون الخشوم الطاغية افرضه فرض
شرع الاله وشال كل الخرافات
شمالها والشرق والغرب ظمه
وجنوبها حتى تسمة باسمه
صقر الجزيرة وتمم الله حكمه
وغدا شعاره فوق كل الشعارات
عز الله يستاهل ولا فيه غيره
يوم قالوا عنه صقر الجزيره
وعساك يا ربي لفعله تجيره
وترحمه يا ربي وتسكنه جنات
وراح الامام اللي غدا موقع امثال
وخلا ديار العز لرجال رجال
رجال بعده حافظة كل ما قال
عبادة الله وهزم كل الديانات
وما مات من خلف له عيال طاعه
مثل الشجاع اللي بقا من شعاعه
هم الرجال اللي خذوا من طباعه
كل خذا منه خصال جميلات
اولهم سعود سعد من عناله
من جاه في حاجة لقا طيب فاله
حيثه كريم وبسمته هي جماله
بعيون شعبه اللي لقا منه خيرات
وفيصل سمي السيف عين الفراسه
حكمه وحنكه وكل وقته سياسه
حتى زرع كل الثقة عند ناسه
وبنى كيان للوطن له مكانات
وخالد ابو قلب تحكمه الحبابه
وصدر وسيع تحتويه الرحابه
مؤمن بربه وكل امرا رضا به
عينه وقلبه طاهراتن عفيفات
الله يرحمهم وابوهم عن النار
ويجعل مكانتهم مكانات الاخيار
حيث انهم حكام ابرار ابرار
ونفوسهم مع كل مسلم بريرات
وخادم بيوت الله وحامي عرينه
فهد العروبة اللي مشى بالسفينه
من بعد ابو واخوان الله يعينه
وعساه ما يشكي بيوم معانات
مشى بسفينتنا على بحر هادي
وعدا بها امواج براي سدادي
وبنى لها مينا يهيب الاعادي
ومن دونها حط الدروب الصعيبات
في عهد ابو فيصل شهدنا الحضاره
وشفنا وطنا زايد بزدهاره
بين الدول وابناه زاد افتخاره
يفخر بموطن اذكرته الحضارات
وعبّد دروب للوطن بالرمالي
اللي تعانيها القدم بالرحالي
جنوب وشرق وغرب ويا الشمالي
غدة دروب ما بها اليوم عثرات
وخلا الوطن يلبس بساتين كنه
بين الدول باشجاره اليوم جنه
عز الله انه فيه ما خاب ظنه
شعب الجزيرة اللي لقا منه مرضات
وسلحنا بسلاح قوي هو العلم
واضوى لنا ما كان بالدرب مظلم
ويكفي هدية خصها لكل مسلم
كتاب ربي اللي جهرت به المنارات
يا الله يا ربي تحفظه وتاقاه
من كل مكروه وباحسان تجزاه
فهد العروبة اللي وصل عون يمناه
كل الديار المسلمة بالمبرات
وتاقا لنا منهو ولي لعهده
اللي لا سند له الفهد شاف سعده
عبد الله اللي حافظ دوم وعده
لخوه ابو فيصل ولا به خلافات
راعي الحرس اللي للاعداء يرعب
وحلال كل اللي على الشعب يصعب
من غير ابو متعب للاعداء يتعب
من واجهه قاصد عدا شاف غارات
يكفي الحرس منه تراثه له لباس
شماغ وعقال وشعار على الراس
وخلا الحرس عين تراقب بلا نعاس
ومن قبلهم لارضه عيونه سهيرات
والنائب الثاني عسى الله يقويه
سلطان جعل العين ما يوم تبكيه
سلطان سلطان الكرم دوم اياديه
ممدودة للي شكا هم عسرات
وراعي الدفاع اللي حمى ارض وغيوم
صقار وصقوره بسماء ارضنا تحوم
وخيال وخيوله خشى منها القوم
خيوله وصقوره تبي منه شارات
ارض وسما وبحور ترقب عيونه
ما غمضت عنها ثواني جفونه
وروحه على ارضه وشعبه حنونه
لو غاب عنهم ساعات جو بنظرات
ونايف ابو عين اسهرة لجل راحه
والشعب يرتاح بمساه وصباحه
وعن كل درب كل مكروه زاحه
شعبه ينام ويسهر الليل ما بات
واخوه احمد نائب الداخلية
يقول باقي الهم خله عليه
من اجل يصبح دوم نفسه سليه
شعب الوطن ويعيش وقته بسلامات
وامير نجد اميرنا دوم امير
بطبعه ورايه اللي حوى حسن تدبير
يكفينا يسمع شكوة صغير وكبير
وناصل لحده لا بغينا المشورات
يكفي الرياض اللي كسبت منه الصيت
وبين العواصم جالها راي وتصويت
العاصمة ياهيه ان رحت وان جيت
بين العواصم اسمها له مضاهات
وجميع مشروع به الخير يعطيه
كل اهتماماته الا حد يبنيه
وحتى يراه ثمره مساكين تجنيه
مسخرن نفسه لكل الاغاثات
ابو فهد سلمان ذكره كما الطيب
يفوح بأزكى الريح لبعيد وقريب
حيث ان فعله زين ما ناشه العيب
والعاصمة تشهد ومنا شهادات
يا زين نسل انسله ساكن العود
نسل الحرار اللي تسموا بآل سعود
من نسله الطيب غدا مثل موجود
يا رب تسكنه الجنان الوسيعات
اولاد ابو تركي جميلين الاوصاف
مثل الصقور اللي ربت فوق مشراف
اللي ذكرته واللي ما جابه القاف
جميعهم يحوي جميل السجايات
يا اهل الجزيرة افرحوا فرحة العيد
بذكرى مية عام لشجعان توحيد
وادعوا عسى المولى لنا خيره يزيد
ويديم حكم آل السعود ابسلالات
حيث اننا بنعمه هي الأمن وامان
في حكم آل سعود من رب منان
لزوم نشكر نعمته بكل الاحيان
وندعي يديم الحكم رب السماوات
والخاتمة نصلي على سيد الانام
المصطفى اللي شع نوره بالاسلام
صلوا عليه اعداد ما مرت ايام
واعداد ما تنبت لنا الارض مرات
