الله الواحد ولا غيره الواحد احد
باسمه الفارس نوى للمسير وشمرا
من صباه اغلى امنياته لملك اب وجد
والمنى يسره ولكن ملفاها اعسرا
ساعة استعرض مسافات واخطار وجهد
في طريق النصر كم ناب شر كشرا
شب فيها واخذ منها مقابيس الوعد
واتجه قبلة وشرق شمال المهجرا
مؤمن بالله متيقن صدق المدد
عاقد لآمال بانه يعان وينصرا
قوته لايمان والعزم والرأي الرشد
في بلوغ امناه من غير ذل وقهقرا
زاده اشواق لداره وميثاق وعهد
وافي كثر الوفى عيبه اللي ما انبرى
جاء يهبد القفره اعصار وبروق ورعد
الحيا ياطا بماطاه والنبت ازهرا
لمّ له ستين فارس وبارود وعدد
زمجرتهم واصلة للثريا مالثرا
من سمو اهدافهم حامي الرمضا برد
والمسار الهم تقدا ومحمود السرى
مع بزوغ الفجر رمحه طعن ليل الكمد
فانبلج مالمصمك اشعاع نور ازهرا
والتقاه الصوت من عالي القصر ولهد
بالصدى في كل فج يهل وكبرا
للامام ابن الامام المليك المعتمد
عانق ادياره وحيته عود وعنبرا
وانهزم عصر الفتن والتناحر للأبد
في قدوم الفارس اللي له الحظ اوفرا
قام شرع الله وحكمه وسيف العدل حد
لين حبه صار في كل قلب معمرا
كلما ينوي لديرة يوافقه السعد
قبل ياجيها تجيه ويطيب المعشرا
شاد ملك وقام دولة لها العاني وفد
شن ثورة عالجهل والزمان الاغبرا
نصف قرن وزود يبني ويعطي ما وجد
حاكم راشد حليم رحيم مظفرا
طامع بالخير والطيب وسواها زهد
للرضا سيد وللشر ضرعام الشرى
فارس حلحيل قبله يفر اهل الجلد
عاشق نجد العذية حبيب ام القرى
انتهج درب السلف لا حياف ولا حيد
دولته دين ودنيا اساس وجوهرا
من هنا دولته رسّى لها ثبت العمد
ثابت المبدا ومبداه ما يتغيرا
يا عسى الفردوس مثواك والظل المدد
ترتوي من سلسبيل النعيم وكوثرا
يا مليك كم وقف كم تنهشل كم قصد
في مواقف مجد ما هيب هل ما؟ هل ترى؟
ليت لك عين تشوف اش وصلنا واش بعد
كم بنينا كم صروح تشاد ومنبرا
في ذرا اولادك ملوك اسود من اسد
خلوا ارض العود جنة ونور للورى
الملوك الصيد فال محا الوان النكد
خيرهم في كل ديره ربيع اخضرا
خيرهم بحر زلال له الصادر ورد
صافي واللي ما ورد ماه ما يتكدرا
كل فارس خذ مسافة في المجد وامد
ما ذخر جهده وضحى وشاد وعمرا
من سعود وفيصل وخالد ويسلم فهد
راشدين خيرين خيار الخيرا
الوطن بافعالهم صار منظومة عقد
يفتن الناظر بهاها وحسن المنظرا
من كثر لامجاد ماتوا مواليف الحسد
واستبقنا العصر والسير ما يتعثرا
في مدى قرن من الدهر للعليا نجد
واجتياز الوقت ناله وساع الصدرا
في مية عام هقاوى النشاما زد وزد
للمسافات اختصار وللحكمة ذرا
وبزمان الخير فهد العرب والله فهد
صايب رايه ولو ضاق مايتهورا
حسبة ابونا وحنا معه حسبة ولد
والولد في طاعة ابوه ما يتعذرا
للوطن حصن وامان ويخسا من جحد
الجحود اللي لحب الوطن يتنكرا
يشهد العالم وتاريخنا والله شهد
بين ما كان امس واليوم والله اكبرا
