في يوم أسود وليل غابت نجومه
والحزن بادي وكل الناس مهمومه
أبكي وأشوف العيون بدمعها غرقا
يبكون واللي يصيح صياح ما لومه
اليوم ينهار معلم من معالمنا
يسقط وكن القبيله معه مهدومه
الشيخ متعب نهار السبت وادعنا
في لحظة محزنة والناس مصدومه
فجأة ولا فيه أحد من هولها صدق
أكبر مصيبة تمر بربعه وقومه
أحدٍ يقوم ويطيح ويلطم خدوده
واحدٍ من القهر قام وشقق هدومه
اليوم يوم الوداع وساعة الفرقا
بدموع الأحباب والأنفاس مكتومه
تشوف حزن الشباب ودمعة الشايب
وعيون الأطفال بالعبرات مزحومه
ياالموت ليتك فديته واحد منا
والا تأخرت لك كم عام عن يومه
لاشك هذا القدر نرضى بحكم الله
أيام الانسان محدوده ومحسومه
يارب تغفر ذنوبه عبدك المؤمن
يارب وسع عليه القبر في نومه
قبر يضمه يجي روضه من الجنة
والنفس بأمرك بدون ذنوب مرحومه
شيخ تصدق وصلى فرضه وزكى
بأركان الإسلام كمل حجه وصومه
يارب تلهم ذويه الصبر والسلوى
يارب تجبر مصيبة ربعه وقومه
