تجري بي الافكار من دون ما اختار

ودموع عيني مثل سيل البديعة

يا ما صبرت امرار وامرار وامرار

كن الصبر بشغاف قلبي وديعه

أسج دمع العين كني على نار

ما ينفع المهموم حسن الطبيعه

ما أبدى الخافي اليا صار ما صار

نفسي عزيزة ما تطيق الخضيعة

هذا زمان فيه تقطيع الاوتار

السر عن الناس كان يذيعه

حلم الأمومة صار هوجاس وافكار

ترى الحلم يا ناس ما نستطيعه

ياقلب ياللي كل ماجاه خطار

فز الخفوق وقال هذا شفيعه

ودي يكون لي ياخلايق ولو دار

العمر يمضي والليالي سريعه

أرجوك يا الولد ترى الدهر دوار

تشريه يوم ويوم ترجع تبيعه

كل البنات اللي معي صاروا اكبار

متزوجات بنص حكم الشريعه

يا بوي خلك من مطاليب وافكار

انت الوحيد اللي علينا نطيعه

استر بناتك واطلب الستر للجار

ترى الدراهم سببت لك قطيعه

خذوا معاشي واعتقوني من النار

لولا الحيا لا صيح صيحه صريعه

هذا ابن عمي من عريبين الاوكار

وذاك ابن خالي في مكانه رفيعه

يازيد انا وابوك شحم على نار

بين الشامى لا لفونا قطيعه

اول انباشرهم بهيلٍ ومبهار

واليوم صار البيت قلعه منيعه

ليلي طويلن والليالي لها اسرار

والياذكرت الهم ضاقت وسيعه

سجني كبير وله مغاليق وجدار

ياحارس الاحزان فك الوديعه

جسمي نحل والجسم صارت له اخبار

اخباري صارت للخلايق تذيعه

مالي مع المخلوق ذنباً ولا ثار

وما من خطا يا ناس حتى نشيعه

اختم كلامي بالتحية والاذكار

على النبي اللي انترجى شفيعه