ياراكب اللي ينوز الى عطى الفجّي
راعيه ما هوب كشات وعساسي
مع الصحاري بوقت الغيم والعجي
ماجنبه سايقه عن درب الأطعاسي
يقرب ديارٍ لها مشتاق واضجّى
يوم أذكر اللي عديم ماله اجناسي
كن المكاين بداخل صدري اتلجي
على وليف نحبه بدت الناسي
يشبه بوصفه غزال الريم ليا هجي
ليا نيّره قانص للصيد بخّاسي
من دونه الدرب مسدود ومعوجي
عليه يوجد رقاباتٍ وحراسي
ما عاد لي حيلة لاشكي ولا احتجي
حتى وعندي شهود الحق جلاسي
الأيام راحت وأنا صابر ومترجي
الله يفرج هموم ظرفها قاسي
ليا عاد بعض العلوم يضيع ويدجي
اكد علومي ولا أسمع هرج بلاسي
خلوني أدله عن الموضوع واسجي
وأما اني أنسى حرام ماني بناسي
في بعض الأوقات كن الفكر مرتجي
تشره عليّ العرب من كثر هوجاسي
كم صبت راس الهدف ماني بمتحجي
وأنا حريص على عزي ونوماسي
اقرأ الرسالة وأنا ماني بمتهجي
والرد في الحال والتعبير من راسي
يا الله يا منجي اللي ماله امنجي
إنك تنجي هوا قلبي من الباسي
