حديث الذكريات البارحة طفّى وراه شموع

شرب ليل السهر لين السهر جفت ينابيعه

وقف حتى ذوى عرق السهر وأذبل وراه فروع

يسوق الهاجس اللي قبل شوفه صعب تطويعه

جلس مثل الكلام بصدر شيخٍ ما لهرجه طوع

،(على غير النشاما) قال هرجي صعب تطليعه

وبعد سال المواجه جف هرجه والكلام دموع

يقول اللي شراني بالغلا لا أموت ما أبيعه

وقال القلب حن وحن من بعده ثمان ضلوع

من أول يوم لآخر يوم كفك طاح توديعه

وأنا كثر ارتباكي يوم قاله ضيّع الموضوع

وأثره الحب هذي عادته تربك مواضيعه

وانا ماقلت واصل لاتواصل وصلك المقطوع

لكن حبل الوصل تكفي لاتجرحني بتقطيعه

أبي منك الخطأ حتى أعتذر لك والزعل مرفوع

ما دام إنه طريق يجيبني لك,, حي توليعه

شبيه بالحياء وأنا بدوي والحياء متبوع

بدويٍ ما اعتذر لو الحياء تبعد مراميعه

وحديث الذكريات البارحة اشعل وراه دموع

وشرب ليل السهر واسقى السهر مالح ينابيعه