العيد حل وهل بالخير شوال
من بعد ما عشنا رمضان ولياله
يالله لعل اذنب يا غافره زال
والرب ما خيب عبيدٍ تساله
يا منجي إبراهيم من نار الاهوال
في قدرتك برد وسلام اشتعاله
يا مرسل نور الهدى خير مرسال
اعظم بني واشرف رسول ورساله
يالله يا منزل تبارك والانفال
بأسماك اسالك ياعظيم الجلاله
يالله تحفظ الدين عن كل محتال
وتحماه من كل الفتن والضلاله
وتنصر ملوك ما رضوا فيه الابدال
يمشون في نهجه على كل حاله
ما فرطوا بالدين زاكين الاعمال
ايضا ولا رضيوا بدين بداله
على الشريعة حكمهم ما به جدال
دستورهم شرع العظيم وكماله
عيال ابو تركي فخرنا ولازال
اللي بنى المجد العظيم وسعاله
مواقفه تضرب بها كبار الامثال
في حكمته في هيبته في نضاله
شخصيته تفخر بها كل الافعال
اسمه يشرفها وفعله لحاله
شخصية تفخر بها كل الافعال
اسمه يشرفها وفعله لحاله
لاعمست الاريا على كل الاحوال
فعله ينومس بالمواقف رجاله
من صغر سنه شارباً مجد الابطال
مجد على غيره صعيبٍ مناله
مجد على متن الشرف والوفا طال
توحيد شعب ولم شمل وجزاله
ما مثل ابو تركي على الخيل خيال
حاش المراجل كلها والبساله
ايو الله اللي كان في نجد رجال
ياحظ من عبدالعزيز انتماله
نجم سطع بامر الولي يشعل شعال
يحكم بشرع الله وجود حباله
قبله جزيرتنا بها الشر يختال
كل على الثاني يجرد سلاله
مايا من الطرقي على المال والحال
ولا يضمن الزراع نبت الحياله
قومٍ تنازل بين نازل ورحال
تحكمهم الفوضى ودرب الجهاله
قبائل تنهب وتنهب وتجتال
كل يبهر بالمشاكل دلاله
فيها القوي يامر وينهى ويحتال
ولا يوجد اللي يردعه عن خماله
جاها ابو تركي وانثنى دونها وقال
داري على غيري محاله,, محاله
هذي ديار جدودنا سهول وجبال
واللي طمع بترابها من هباله
تبشري يادار والخير لك فال
واللي نواك بشر ياشين فاله
تزيني ماعاد به حقد وقتال
الشر زال وحل خير بداله
كل بعيش بخير ينعم ويكتال
شرق وغرب وفي جنوب وشماله
اسس لنا دوله لها مجد ورجال
دولة هل العوجا سيوف العداله
يالله عساله جنة الخلد منزال
اللي يفعل الخير حرص عياله
وصيةٍ تحفظ من اجيال لاجيال
ما فرطوا فيها رجال الشكاله
ملوكنا العدلين والحق ينقال
رمز الشرف رمز الوفا والاصاله
هم درعنا هم سيفنا عز وظلال
ظلٍ يظللنا ونسكن بجاله
لهم الوفا منا وتقدير واجلال
هذا هو الواجب ولا هي جماله
حنا لهم وافين صافين وعيال
وزعيمنا كل الولا والوفا له
فهد ملكنا سيرته تشرح البال
بالعدل يحكم دولته من عداله
تشهد له العالم وتفخر وتهتال
من حنكته وسياسته واحتماله
سيف العرب من هيبته يامن الذال
كم خايف قام الفهد وانتخاله
خادم بيوت الله عن الحق ما مال
درعٍ يذري من نصاه وعنا له
الشرع له منهج ومصدر ومنهال
وسنة نبي الله وصحبه واله
واخوه ابو متعب للامجاد مدهال
المجد لو هو بالثريا رقاله
ولي عهد وللصعيبات حلال
شهم يعيشون الضعافى بماله
يا معتق الارقاب يا مرخص المال
تعطي يمينه مادرت عن شماله
اكرم من الرعاد بالخير همال
يا باذل لاجل اليتامى حلاله
ياريفهم عن كل ميله وغربال
كنك عليهم ماخذٍ لك وكاله
لهم لهم بأمر الولى صرت كفال
ومن جاك تسأل عن ظروفه وحاله
هذا أبو متعب درعنا وقت الاهوال
صافي لاجل شعبه وشعبه صفا له
ما حط دون الشعب بيبان وقفال
الشعب عنده كنهم من عياله
هذا الاصيل معرب الجد والخال
يكفي فخر قدام شعبه قباله
مواقفه دايم شريفات وجزال
يفزع اليامن الضعيف اشتكا له
شفناه بعيون الارامل والاطفال
والعود زوله ما يفارق خياله
يزيارته يسعى لتحقيق الآمال
يخاطب العالم ووجه سؤاله
خطب وقال وفصل الوضع تفصال
السلم ما هو للعروبة لحاله
صحيح نصبر لكن الوقت لو طال
النصر للمسلم يحين احتفاله
والله ما نرضى فلسطين تغتال
والقدس والله ما رضينا احتلاله
وحنا بعصر كله الوان واشكال
عصر يعرف اهل العقول اختلاله
مشاكله تبقى عريضات وطوال
الله يجنبنا غثاه ووباله
الواجب انا نتحد فعل واقوال
ونحارب اللي يتبعون الرذاله
