سر يا قلم وكتب على صفح قرطاس
رتب حروف القاف فوق القراطيس
بمناسبة ذكرى الوطن هب نسناس
عانق رياض المجد ريح النسانيس
روضة ربيع زرعها غرس غراس
نجني ثماره ما غصونه ميابيس
بجهود عودٍ عاد ما عاده الياس
مرحوم يامن اسس الملك تأسيس
ذاك المليك المقرني ماله اجناس
مقدام ما مثله سرى بالغطاليس
فعله بيانٍ شاع تدري به الناس
دواس روس عداه وسط الحناديس
بالليله اللي ماهوى جفنه نعاس
واصبح صباحه منتصر وانخزى إبليس
طلع سوات الليث من عقب ماجاس
وخم الخبيث وحاص كل الحراريس
معه اخوياه اشباه في قوت الباس
فازوا على عجلان تحت المتاريس
رواد والقائد معزي على الراس
فاز ابو تركي والاعادي مفاليس
مقدام شال السيف قطاع الانفاس
واعاد ملك اجداد وصفاً وتقييس
قوى بالايمان قوه بلا قياس
فارس شجاع وفيصلي ساس فريس
خاض الجزيرة فوق قب من الافراس
وساد الامان ونكس الظلم تنكيس
لم الشتات وحط للدين نبراس
وحكم بشرع الله منهج وتدريس
بعده حكمها انجال حكمه ونوماس
ولبست ثياب العز خير الملابيس
والحمد للمحمود ما عندنا اتعاس
تبدلت حال الشقا والتعاميس
بجهود عودا عاد ما عاده الياس
مرحوم يامن اسس الملك تأسيس
