يا مل عينٍ دمعها كل ما جفّ
تنشد طواريق الدهر وين ماها
تدلي على محجر عيوني وتغرفّ
وتملا سوانيها وتروي ضماها
تسقيك يا روضٍ من العام ناشف
ارضٍ سحاب الوسم عقبى جفاها
تنعى ربيعٍ فوق ريضانها ضف
والعشب والنوّار عانق سماها
جوٍّ به الديمه تنادي وتهتف
جوٍّ به الرعاد جفّل قطاها
ارض بها يمشي الحبيّب وياقف
الله يسقي جرتٍ له مشاها
يوم يتمشى للزبيدي ويقطف
الارض تضحك يوم يقطف كماها
فز الزهر خجلان وده يسولف
واظن حتفه لا كشفت له غطاها
يا الله عليك الحال تدري وتعرف
تجلي وهج عينٍ تجدد عناها
عساك يارب المخاليق تلطف
ارضٍ بها دجنا تجدد حياها
اليوم مالي وسط ريضانها شف
لكن احب اثني وابين صخاها
ارض اجمعتنا فوق عشب ترادف
يوم الليالي ما صفت من قساها
ويقطعك يا وقت كما الرمش لا رف
ولّا ذلول ما تداني عصاها
ويا مل عينٍ دمعها كل ما جف
دلت طواريق الدهر وين ماها