ودي أقدم نصيحه من النوع الفريد |
والنصايح بعضها خير من حمر النعم |
ما يفيد من المخاليق غير المستفيد |
والبشر ماهيب تعطيك شي من عدم |
يا بعيد الشوف لا صار لك مرمىً بعيد |
الكنانه ما تفيدك ليا ضاع السهم |
والركاده ميزةٍ في هل الراي السديد |
والتعجل فاغلب الظن يتلاه الندم |
اطلب العليا وعاند ليا جاك العنيد |
ومن جلس بين الحفر ما تعلوى فالقمم |
ورجل بليا وفي شيكٍ بليا رصيد |
ما يسد الموجبه لو عليه أكبر رقم |
والمراجل تنقص أيام وأيام تزيد |
ويا عسى بيض الشباري تعوّد فالشحم |
ومن يقول إن الجزايل من الكف الزهيد |
مثل من قال التمر عند مصّاص العجم |
والشقي فالكون ما حالف الحظ السعيد |
والسعيد اللي بربه ودينه معتصم |
خلها حكمة حياتك واخذ بيت القصيد |
ما يصيب الآدمي غير ما ربي قسم |
والتكبّر كم هلك به من الأقوام سيد |
والتواضع كم رفع منزلة راعي غنم |
سالم بن دخيّل الحبابي - الخرج |
|
