في رثاء الفقيد محمد بن ضيف الله المطيري رحمه الله |
البارحة ساهر والنوم عني بعيد |
واللي بلا هم يطرب في لذيذ الكرى |
واللي مسهر عيوني فاقد لي فقيد |
في حادث حول ديرة حرب صار وجرى |
ارثيه وابكيه لو أن البكا ما يفيد |
لكن جرح بصدري ملتهب ما برى |
وشلون أبا انسى الرفيق اللي بطيبه فريد |
من عقب كنا رفاقه بالطعام خشرى |
لكن هذا الموت ما أحد عنه يقدر يحيد |
واللي ماجاه السرى بكره يجيه السرى |
يالله ياللي تدبر ما تشاه وتريد |
ياعالم ما نكن وما نقول جهرى |
ياللي لك الخلق من فوق البسيطة عبيد |
ومن فيض جودك تمد الخلق زاد وذرى |
عساه ماواه للجنة بقصر مشيد |
ويا جعل قبره مقر المسك والعنبرى |
ويالله عسى موتتي لا جات موتت شهيد |
لا وسدوني يميني تحت لبن وثرى |
ولهمني بكلمة التوحيد وانت المجيد |
لا اقبل عليه نكير وصاحبه منكرى |
واصبحت في عالم البرزخ لحالي وحيد |
في منزل ما يعرف ملوك ولا امرى |
ما يعرف إلا العمل كثير ولا زهيد |
ويفوز عبد تمسك في وثيق العرى |
يا الآدمى ودي اقول لك كلمة واعيد |
مادام اذانيك توحيني وعينك ترى |
انا اشهد ان المكاسب والغنا والرصيد |
هي طاعة الله جليل الملك رب الورى |
ترى ما تعمل مكلف به رقيب وعتيد |
لكن بادر بفعل الخير قبل الزرى |
دنياك هذي دنية ما عليها سعيد |
كم قدمت ناس قدم ورجعتهم ورى |
وإعداد ما غنت الورقا بخضر الجريد |
صلوا على اللي صدع بالحق بام القرى |
ابو زيد الغبيوي |
|