تركت ما قالوه ولا قريته |
يا صاحبي هالوقت يا كثر الاقوال |
لو للبشر كل اهتمامي عطيته |
اصبحت ما عندي طموحات وأمال |
لا والذي شرف بالاسلام بيته |
ما ترجع اقدامي عن الدرب لو طال |
الشعر من عصر الطفوله هويته |
وهوايتي تخليد جزلات الأمثال |
عندي ثقه ما قول ليته وليته |
إليا قراه القارئ يجمل الحال |
من هاجسي جزل القصايد بنيته |
بني القصور اللي بنوها من المال |
ليلاً سرت فيه الذيابه سريته |
ومريت بالمسرى على ذيك الأطلال |
لقيت فيها الشايب اللي لقيته |
مازال حي ويحمل السيف مازال |
شكيت له من همي اللي شكيته |
قال استريح ولصعيبات حلال |
عندي خبر بالواقع اللي حكيته |
يوم قامت الدنيا على راس رجال |
لقيت كله حاصل اللي هقيته |
ماقلت لك بكره تجي ضايق البال |
مدحت لي حاضرك ولاهجيته |
الحق له قاضي وللخيل خيال |
خذ سيفي اللي وارثه ما شريته |
وليا حداك الوقت تضرب به الجال |
يقضي على قلب الحسود ويميته |
مصقلاً يفتح مغاليق الأقفال |
يكسر شموخ الضلع وليا رقيته |
جاك الجمل في حملته دون جمال |
السيف لو لا هيبته ما خذيته |
خله يعدل ميلة الوقت لامال |
يا صاحبي واللي سمعته نسيته |
ما عاد صار يهمني كل ما يقال |
مقبل البلوي |
|
