دعاني للهوى داعي فتن قلب الحزين وراح |
وأنا لبيت للداعي من اعماق الفواد وجيت |
خذاني بارق أحلام على ذيك النوايف لاح |
دفعني هاجسي صوبه مشيت الدرب ما حسيت |
على خط الحبيب اللي لعب بي حبه الفضاح |
قطعت الدرب يطويني حنين منه ما مليت |
كفخ قلبي مثل طير زهم له رامي الملواح |
كفخ حين انتهض حلم بقلبي له زمان ميت |
بدا صمت السنين اللي حفظته داخلي ينباح |
تروعني هجوسٍ لا طراله طاري فزيت |
بدت سلواي من هم الزمان اللي رحل تنزاح |
بدا يغرق فوادي والفواد ليا غرق وليت |
نطحني واهج الماضي مثل موج كسر سباح |
دخلت بدومة الاخطار لا هالك ولا عديت |
تصور لي من الماضي بقايا كنها الاشباح |
حقايق يلفظ الواقع صورها تشبه (الاوبريت) |
توارت عن نظر عيني شموع الشوق والافراح |
قناديل السرور اللي معاها بالزمن سجيت |
اذ الحاضر قتل حلم مضالي وانطفى المصباح |
وحالت دونه الاوضاع مهما قلت أو سويت |
نزع حبل الرجا فيني مثل ما تنزع الارواح |
تسابق داخل احساسي هموم كنها الكبريت |
اباخذ مصحفي واقرا واباخذ في يدي مسباح |
واسبح بسمه الاكبر ولا اشتدت علي صليت |
أحمد حمدان |
|
|
|