قصيدة رثاء في الشيخ سعود بن محمد العماج
|
مرحوم يا شيخ المراجل والافعال |
شيخ ليا عدو شيوخ القبايل |
من ترثه شيوخ حلحيل وابطال |
من نسل عذفر شيخ جزل الفعايل |
فعايله تذكر عريضات وطوال |
لاجا نهار فيها قدح الفتايل |
مواقفٍ يضربها جزل الامثال |
وفعالهم اثبت من جبال حايل |
فيا سعود يالعماج باقي ولا تزال |
حي ولوك تحت حمر النثايل |
لك في قلوب الناس حبٍ ومنزال |
وتاريخك أبيض وانت وافي خصايل |
مواقفٍ تذكر على مر الاجيال |
اقولها وعندي عليها دلايل |
له في دروب الخير بصمه ومنوال |
وفي الدين ما جامل وللعز نايل |
يشهد له المسجد على كل الاحوال |
في البرد والا في سموم القوايل |
طيب صلاه وصوم ويزكي المال |
ونفايل يا طيبها من نفايل |
فيه التواضع والوصل طيب الفال |
وقلبه نظيفٍ من جميع الغلايل |
ولا يقبل النمام والقيل والقال |
ويعدل بحكمته من كان مايل |
حلال صعبات المواقف والاشكال |
وعلى كثير الناس جاله جمايل |
الحق حق وكلمة الحق تنقال |
بين البشر طيبه وشكله قلايل |
جمل محامل للثقيلات شيال |
وفعايله يا طيبها من فعايل |
ومواقفه مع الملك تشرح البال |
عبدالعزيز اللي وطى كل عايل |
فيالله يا منزل تبارك والانفال |
تسقي منازلهم حقوق المخايل |
عبدالله بن هادي بن القعيمه |
|
