اشرق اللي زان ضوح الدار في ساعة وصوله |
واستعاد النبض شوق الناس من بانت رحاله |
ياهلابه غيث روّى البيت من غيمة هطوله |
من قراح الروح تسقي سيرته غيمة اخصاله |
ياهلابه والملامح زاهيه والناس حوله |
كنها عقدٍ تولّف بالفرح واضحى ظلاله |
ياهلابه والجهات من الوله عجزت تطوله |
من فرحها جت تلبّس راسها هامة عقاله |
ياهلابه مد يد الخير وامتدت فصوله |
سلّمه ربي لشعبٍ شوفته هي راس ماله |
لاسلم هالمجد يسلم والعطا لاشاف زوله |
عانقته المزن باللي من سنا سلطان جاله |
كن عدّه هو عتاد الدار وخيوله خيوله |
كن كفّه هو نكوف الشر عن بيته وجاله |
كن وجهه في صباح امجادها مجدٍ يعوله |
ما تراخت في ظلام البعد عن دلوه حباله |
غاب لكن بالغياب نحس طول البعد طوله |
شامخٍ ما حسّ قلب الشعب غير بضيق باله |
وقفته للدار عز وقولها يكفيه قوله |
لا تكلّم قال حرف القول لبيه ومشاله |
له بكل امجادها اسمٍ ما توانى عن حلوله |
لا تعسّر في فضاها الحل ابوخالد رقاله |
ذا بها سلطان وابهى من مواعيده حلوله |
ياهلا به يوم دم قلوبنا مرويه فاله |
تزهر الفرحة وتضوي في فضا منهم مشوا له |
بالقلوب اللي وفاها من وفا طيبه وفاله |
مجدنا العالي تعلاّ بالحيا واضفى بقوله |
ضينا اللي لاغشتنا عتمة الوقت انعناله |
ياهلا بك ياوفي العهد ياحصن الرجوله |
ياهلابك ياعرين الطيب يابهجة مناله |
ياهلابك ياعظيم الصبر يامعنى مثوله |
في وجوه الناس نقرا الحب يستعجل مثاله |
ياهلابك والمعاني من ضيا حرفك خجوله |
ما لحقها الشعر قبل الشعر يستوطن خياله |
من تبوك الورد فاض الورد وازدانت فصوله |
والسواد بفجر عينك بارق الفرحة بدا له |
لك تحية من شمال الحب ليدينك عجوله |
والله انا من فرحنا البيت شدتنا حباله |
د. نايف الجهني |
|
