لا يغرّك حجب دمعي عن ظهوره
|
لا تقول انّي سليتك.. ماسليتك
|
دايم استر دمع عيني ستر عورة
|
والاّ انا ياما تضايقت وبكيتك
|
اوّله يوم الغلا فاربع شهوره
|
وآخره في يوم جيت ولا لقيتك
|
اعتبر مسياري لجارك.. ضرورة
|
لجل اوقّف موتري قدام بيتك
|
وانتظر لي ربع ساعة.. عند سوره
|
ما خبرت اني دخلته.. ما احتريتك
|
وانت تاخذني على عميا مشورة
|
مسرفٍ بي لا رحم حيّك وميتك
|
تحسب انّي ناسيٍ حبك ودوره
|
لو نسيت ابوي وامّي ما نسيتك
|
الله اللي حطّ لك في العين صورة
|
والله ان يمحى نظرها ما محيتك
|
تلمحك روضٍ يقلدني زهوره
|
ناعمٍ لو انّك بتوكل كليتك
|
موج حبك في الحشا صفقة وفورة
|
والظنون تسد نفسي لا اشتهيتك
|
وش تعللها عليه من الخطورة
|
يا معللها على ليتك وليتك
|
واحدٍ من طاري اسمك طق زوره
|
وش يقول ان سمع لبيك وفديتك
|
عذره بمخباه لو يفقد شعوره
|
وانت عذرك لا رماك الله رميتك
|
لا تهز الغصن وتطيّر طيوره
|
اتق الله واحترم مجدك وصيتك
|
وان حداك مساير النفس الغيورة
|
مرحبا من واحدك لاكمبليتك
|
ارمني فالنار من عميا مشورة
|
واسرف اسرف لا رحم حيّك وميتك
|
مدغم أبو شيبة |
|
