من يوم وجهك يالزمن ذبْ ملواح |
كثروا علينا رافعين المشاعيب |
حطيّت من دونك عن الضيقة سْناح |
حطيتها!! والطيب في ماكر الطّيب |
حَدْر القمر راعي المجاهيم سوّاح |
يرد صوت الذيب ليمن عوى الذيب! |
يسري بْدوٍ ما معه زند! وسْلاح |
وليِّ حياةٍ ما تعرف المواجيب |
حنّا نشدنا وادي السَّرح وطْلاح |
روّح حلال القوم؟! يا لفطّر الشيّب |
ماكنيِّ آلا الطّير لا راح لا راح!! |
عوّد ووقّع فوق روس الشخانيب |
هذا زمانٍ فيه للطّيب مْسراح |
والمرجله ما تنمسك بالمقاضيب |
هذا زمانِ خاسره يجني الارباح |
ما سج رجله فوق حرش العراقيب |
بعض العرب.. تلقاه داله ومرتاح |
ماله نظر!! في شبة النار يا كليب! |
والناس في عيني غدت مثل الاشباح |
إلا عيونٍ ما تّذل الرّعابيب !! |
هذا الزّمن!! ذب آخر الوقت مْلواح |
وكثروا علينا رافعين المشاعيب |
عبد الرحمن بن محمد الفاضل |
|