الغيم: كف الريح الأبيض والشفق: غوايشه |
والجبل: ساق الريح الأسمر والمسايل به: حجول |
والأرض: جلدٍ شَعره الأسود: خضر حشايشه |
وبالشيب يبيّض الشَعر والشتا تبيّض الحقول |
والفضا: بيتٍ فاتح بيبانه ودرايشه.. |
للريح.. تلعب بارضه وسقفه وباطرافه تجول |
والقمر: ما احدٍ لو تناوشه بيديه بنايشه |
ولو يتطاول ويتطاول ويتطاول ما يطول |
والله هو اللي فوق ها الكون اعتلت عرايشه |
والكون كله زايل وسبحانه اللي ما يزول |
والطيب: ما احدٍ دون خلق الله لحاله حايشه |
لو دخل من باب الخروج وخرج من باب الدخول |
والشعْر يا اهل الشعْر: انا اللي كل يوم أعايشه |
لكن ما احب اقول غير اللي عجز غيري يقول |
والحب والله ما هو حب اهل العقول الطايشه |
الحب: والله حبي لْمن حبها على أصول |
رشيد الدهام |
|
