النفس مرتاحةٍ ما هيب مرتاحه |
تجهش عليها الطوارئ لين تنساقي |
انواب يم الشمال ونوب للباحه |
اسري ومد النظر وأقول مشتاقي |
الفكر حساس بالمسرى ومسراحه |
وأنا كثير الحرص لا تكشف أوراقي |
أحدٍ قصيدة على لوزة وتفاحة |
وحدٍ قصيدة رهيف الحس ودقاقي |
والكل له ذوق والشعار بالساحه |
مع كثرة أعدادهم يا كثر الأذواقي |
والحق وشلون يطفي نور مصباحه |
أسامين بالجزيرة تحرق احراقي |
هذي قضية كمل الجمرة على الراحة |
أدور فراقاها ودور افراقــي |
في كل حاله لكن العاقل سلاحه |
العلم والمعرفة مع حسن الأخلاقي |
والعاقل اليوم لو يخسر من ارباحه |
لراحة النفس عن ماكر وبواقي |
كم غلطة بالخفا مسحت بمساحه |
ياكل عليها الزمان ويمشي الساقي |
واللي شرى الحزن لا يندم على أفراحه |
يبلى الأوادم بنفسه والله الواقي |
أهديت باقة بعطر العرف فواحه |
من قلب ولا الحياة حظوظ وأرزاقي |
والرزق بيدين رب البيت مفتاحه |
والمال يفنى وذكر أهل الوفاء باقي |
صالح بن عبدالرحمن الصالح الناصر |
الزلفي |
|
