قال أنت بك مسحة حزن قلت غلطان |
أصلاً أنا كلي من الحزن مخلوق |
وجهي مدينة دمع والحزن سلطان |
والضحك مبطي من محياي مسروق |
مثل السجين أمسي والأحزان حيطان |
عطشان للفرحة ولا حولي بروق |
رحال ادور موطني بين الأوطان |
زهابي الأحزان والدمع والشوق |
واللي عطيته أثمن العمر سفطان |
أقفى وانا في حبل الآمال مشنوق |
من يوم أخذ غالي سنيني ولا اعطان |
كذّبت جملة كل مطرود ملحوق |
مركب حياتي مبحرٍ دون قبطان |
الموج من تحته والأرياح من فوق |
ما لاح في عيني من البعد شطآن |
شمس الفرج ما عندها نية شروق |
متمشكلٍ مع جرح حزني وورطان |
تنقصني الخبرة وينقصني الذوق |
بذتني احزاني وانا واسع بطان |
من ونة الخافق الى دمعة الموق |
أعوذ بالرحمن من كل شيطان |
واساله الرحمة اليا التفت السوق |
سليمان راشد الغفيلي - بريدة |
|
