العمر رحلة سنين ودربها شاق

والآدمي في حياته وش حصيله

إن كان ما هو لفعل الخير سبّاق

ويترك مع الناس له ذكرى جميله

والارض يسكن بها من كل الاعراق

من كل دوله ومن دين و قبيله

احذر لو إنّك تمشّى وسط الأسواق

ماكل عين ٍ تناظر لك كليله

تراك مثل القلم والناس الاوراق

ما تكتبه عنك صعب إنك تزيله

لذا عليك التحلّي بأسمى الأخلاق

هي السلاح الذي لازم تشيله

فيها تملّك قلوب وتوصل أعماق

بالذات لا صارت اهدافك نبيله

كنْ مبتسم دائما للخير توّاق

تمدّ كف المحبه والفضيله

تعفو وتصفح وصدرك فيك ماضاق

تسمو بنفسك عن (اسباب) الرذيله

مفتاح للخير وإنْ جا الشر مغلاق

في كل ارضٍ تجي تزرع فسيله

تقدر بطيبتك ترضي كل الاذواق

والمسلم الصادق اخلاقه دليله

باخلاق الاسلاف وصل الدين الافاق

من غير شلفا ولا سيوفٍ صقيله

كان التعامل بصدق وحسن ميثاق

هو الوسيله وكان افضل وسيله

وانك تشبّه بهم في كل ما لاق

اكيد ماهي بحاجه مستحيله