سلامتك يابومتعب والله اللي كتب

ما جاك واللي حصل لك بإذن ربك طهور

كلّش ليا قدّره مولاك جا له سبب

والحمد لله مبشرٍ كل عبدٍ صبور

لقبت باسم شريفٍ وانت صقر العرب

مليك محبوب من شعبه لدينه غيور

غلاك يا خادم البيتين فوق السحب

وحبك كتب في صدور سنينا والشهور

يشهد بما قلت لوهن ينطقنّ الكتب

ولا شك عن نطقهن ينبيك ما في السطور

الشعب حبوك لاجل انك مليك محب

وحبك للايتام يابومتعب أسما شعور

نرفع أكف الضراعة يا مجيب استجب

واحفظ ملكنا المفدى.. والعدو معثور

والبسه ثوب العوافي حاضر ومغترب

واشرح بعافية ابو متعب جميع الصدور

يرجع لنا سالمٍ غانم على ما نحب

ونقابله بالمحبة.. والغلا.. والزهور

واستاذنك يا حبيب الشعب وبكل أدب

أكمل بيوتٍ لي وللغير.. والنور نور

يابن آدم إن مرّ بك عارض وجالك تعب

نفسي وصابك ضرر من محدثات الأمور

لا تلحق النفس وإلا الحظ لوم أو عتب

ماجور من يحتسب للأجر ولا يجور

العافية ما تعادلها كنوز الذهب

وأموال قارون ما تدخل عليك السرور

لاصرت تشكي مرض وإلا تشنج عصب

ساعة مرور الزمن يا صعبها في المرور

يارب تشفي المريض اللي رفع لك طلب

وتعافي المستضرّ وتحفظه يا غفور

ما تنحصي نعمة المعبود ربٍ وهب

خلقه كثير النعم.. عساي عبدٍ شكور