ياقصيدي وأنت مثل الشمس شارق

وللنجاح ظروف واسباب وعوامل

والله انك بالفكر والطرح فارق

بس وين اللي مع الشعر يتعامل

بالعذوبه واصدق الاحساس غارق

متّزن بالمحتوى والطرح شامل

سهل في مبناك وبمعناك خارق

بس ياصعبك على بعض الأنامل

ويوم غصنك بالثرى والروح وارق

عابي(ن) لك من ورى صدري معامل

لاطرقني من هجوس الوقت طارق

احيي المعنى بعد ماكان خامل

وان لقيت الغفل حطّيت المطارق

ومايمثل هاجسي والوسم كامل

في طروق النظم ترّكز لك بيارق

ولو ابي غنيت بك عرضه وزامل

مااقول اني على الشعار مارق

يزخر الميدان بجمال المحامل

فيه ناسٍ بالمغارب والمشارق

شعرهم مثل الصخر عالي وصامل

بس قصدي من يحبون المدارق

كبرهم لاشفتهم واللبس سامل

يارصيدي لايهمّك كل سارق

أنت حدّ اليا عترض لك كل هامل

ماعليك من المحابا والمزارق

أنت مجدك مابنيته بالمجامل

لو نخايل بالليالي كل بارق

والله أن الحيل لتعوّد حوامل