الا يارفيق الدرب خلك على يمناي
ونا هقوتي بك هقوتي ماتخيبها
وعاهدك في درب الردى ماتسير اخطاي
ولا اهين نفسي وأتهاون بواجبها
والا يابنات الفكر بالشعر يمي جاي
لعقلٍ يدير النادره لين يكسبها
ترى الشعر في عقلي ودمي وكل اعضاي
جرى بالعروق وكل الاحساس صاحبها
وانا اللي حداني في شجوني وفي مسراي
دروب الغرام وماجرى من مصايبها
مادام الوداع وفرقة الشمل والاقفاي
قريبة عسى ماعاد يومٍ يقربها
الا ياوزين الروح ياغايتي ومناي
على هون لين النفس تلحق مطالبها
تعال انتعاهد ونتوادع ونقطع راي
ترى ساعة الفرقه تحرك عقاربها
وانا يوم اسوق النفس يمك بحكم ارضاي
ابارك لها بالخطوة اللي تقربها
وانا خايفٍ لحظة فراقك تشل اقواي
واهدي ميول النفس يمك وعاتبها
على اضعف من السلك الردي تنطوي رجواي
وانا خايفٍ من هجر الايام يذهبها
بحسناك وبفضلك لافضلي ولاحسناي
توقف واخذ جملة من الشعر رتبها
ترى انت الهدف في كل شعري وفي معناي
بيوت الغزل لولاك والله مااكتبها
تكلم ضمير الحب يندب بصوت الناي
ولازلت اصدق فيه نفسي واكذبها
يعيدٍ قريبٍ راح مقفي وعوّد جاي
يلاعب جنون العقل من شان يطربها
لهاب الوسيدي
