قصيدة شكر لمعالي الشيخ عبدالمحسن بن عبدالعزيز التويجري، نائب رئيس الحرس الوطني المساعد على ما قام به من واجب التعزية في وفاة شهيد الواجب - منديل بن فالح السبيعي في محافظة رماح يوم السبت 3-2-1432هـ..

بسم كل الحرس مني تحيه

تقدم للرجال اللي وفيه

رجالاً ساعة الضيقات تبرز

مواقفهم على الساحة جليه

مهوب اليوم من خمسين عاما

لغاب تويجري يجيك زيه

رحل نائب وجا نائب مكانه

ما مات العود تبقى النار حيه

وأنا ما قول قول بلا دلايل

وقول بلا دليل أكبر زريه

نهار السبت خففت المصيبه

على أجوادً مصيبتهم قويه

عسى الله يرحم اللي مات منهم

وتعازينا لبوه وللبقيه

مجيك للسبيعي في محله

يشرف كل رجلً به حميه

هذي عادتك يا راعي المواقف

وجزاها عند خلاق البريه

ترا ما باقي إلا مثل هذي

وترا الدنيا ولو زانت دنيه

أبا غيرك يسوي مثل فعلك

ونا خابرك ما تبغى وصيه

ونا شاعر وأمثل لي قبيله

وترا الغلبا لهم حقٍ عليه

بني عم العتيبي والسبيعي

ولا بين القبائل عنصريه

ونا في مثلها كني سبيعي

أقدم باسمهم شكر وتحيه