يضيق الكون من حولي إذا شفت الحزن يغشاك
وهمك ليلة البارح يكفي ماخذك عني
وش اللي زعلك عمري عساني فدوةٍ لرضاك
وش اللي كدر الخاطر عسى ما هو خطا مني
تركت القلب في حيره عجزت افهم سبب مسراك
سرحت بهاجس افكاري سهام الشك تطعني
تموت الفرحة في عيني إذا طريت لي فرقاك
لأني فبعدك اتألم وحزن الكون يسكني
نزفت الجرح لعيونك ودمعٍ غاليٍ يفداك
ولبست من الحزن ثوبٍ نقشت بداخله فني
حبيبي بهجة ايامي تعال ومدلي يمناك
وثقت فحبك الغالي وابد ماخاب بك ضني
اناجي بالغلا روحك وصوتٍ من وله ناداك
أبسمع أصدق احساسٍ عشقته من صغر سني
تبسم يا بعد عمري عسى الفرحه تجي دنياك
تبسم تضحك عيوني وعصافير الهوى تغني
يا سبحان الذي ابعد جميع الخلق لي وادناك
عرفت أن الهوى قسمه وربي فيك فاتني
أمسية
