ان جبت جبت القصيد النافع الصيّب

اللي يخلي هل الساحه تهذريبي

اصون قدر الرفيق ان غاب واغيّب

سرّه واسرّه لو ان الوقت يومي بي

باكر تبي تقفي الدنيا وابا اشيّب

يالله عليك الفرج لا طحت من شيبي

يا مالك الملك واللي عندك قريّب

لا شبت مدري زماني وش يسوي بي

الحظ ما هوب منصفني وانا طيّب

وشلون لاطحت وانكسرت مخاليبي

ياللي لبسك الخطا والعيب وتعيّب

لاني مصلي بك ولا انتب مصلي بي

الزم حدودك وخلك يابو حبيّب

تراك تعرض علي واصد من طيبي

يا تركي ان شد عودك عدك صحيّب

مابيك باكر الا شيّبت تصخي بي

ابيك محزم نهار اللازم النيّب

وابيك جيبي الا شق العوز جيبي

اليوم اوكلك بيدي خبز وحليّب

اغذاك انا ليوم تكثر به مطاليبي