نحمد الله صفنا بالمملكة واحد وغايتنا شريفة

دايم راياتنا بافعالنا بيضا ولا دنس شرفنا

بالوفا ما احدٍ وصل معنا ولا قارب ولا خمس النصيفة

الوفا منا وفينا ما نصيناه ودخلناه وولفنا

نهجنا واضح وابو متعب (عدِل) والدار في عهده مريفة

وفي ولي العهد ابو خالد حليف الخير حالفنا نصفنا

زيَّن التاريخ فعل اجدادنا من كانت الدنيا كليفة

وان بغينا وصفهم ضاق الكلام وضاع منا ما وصفنا

كلنا للحق عند الحق بين الناس نوَّاب وخليفة

لو علينا الحق من نقوة ضمايرنا صدقنا واعترفنا

ديننا دستورنا وقلوبنا للدين وانصاره حليفة

ما رضينا غير منهاجه لنا قصد او طريق ولا انحرفنا

طيبنا من فضل ربي من خلقنا بالشواهيق المنيفة

يفخر العز بمواقفنا مع ان العز شيٍ من هدفنا

العوايد من عوايدنا تعلم ولعوايدنا وصيفة

والمفاخر في مفاخرنا تباهى كنها نسل لسلفنا

ما ملكنا دارنا منوة ولا عنوة ولاجتنا خفيفة

دارنا هي دارنا من خلقت الدنيا لما ان الكون يفنى

من نواها بالردى قبل النوايا صابته بالقلب خيفة

وانثنى كن النوايا والهقاوي فيه بالعين تعرفنا

سورنا قوة مواقفنا وصولتنا على الباطل مخيفة

من سلفنا لين يوم الدين باذن الله ويبقى في خلفنا

عين من لاشاف هيبتنا وغضبتنا وشدتنا (كفيفة)

ما تكلفنا فعايلنا ولا فيما نفاخر به زهفنا

قربنا مثل الهنا للقلب برضانا وغضبتنا عنيفة

من تعدى الحد ذاق الموت قبل الموت وان قمنا قصفنا

ومن سعى لقلوبنا مقبل.. لقى في طيبها والحق ريفه

طبعنا هو طبعنا ما قد تغيرنا ولا يوم اختلفنا

جارنا يبشر بطيب الجار.. دون الحيف حنا قبل سيفه

ناقف لحقه وكن الموت من دونه لاجل حقه ترفنا

ما شكا من جورنا منا ضعيف أو ضاق من شي يخيفه

كلنا دونه لما تضحك له الدنيا على الشدة وقفنا

(خيرنا واحد) يسيل الوجه ويفيِّض على وادي حنيفة

ويضحك النوار في عرعر ورا سيل القصيم وفي طرفنا

(برق جدة) يفرح الخفجي قبل جدة ورا لمعة رفيفه

وان شكا عودٍ ب(نجران) ب(تبوك) يجاوبه صادق لهفنا

وجهنا الشرقي يوازي بالغلا والحب.. للغربي وسيفه

ما علينا لو بحب الدار واهل الدار للعالم هتفنا

ذي عوايدنا مثل ما هي سعوديين والغاية شريفة

فعلنا بين الملا يشهد لنا صيته ولا دنِس شرفنا