جاتني وتقول خلي واحشٍ قلبي كثير

قلت وش شوقك مع اللي من حنينه مات شوق

يوم قلته غارت وجارت حروفي بالنظير

واوصفت لي وش عطتني واتحدى في الفروق

قالت ادروبك ظلامٍ تايهٍ فيها المسير

لين طلت لك عيوني وابتدى فيك الشروق

قلت ظللتك غمامي مادريتي بالهجير

كاسبه ظلي وانا اللي امتلى ظهري حروق

قالت اخترتك وانا اللي كم تقدم لي وزير

واختيارك معصية لعقلي وطاعه للخفوق

قلت رديتي وزير وانا نصبتك أمير

منصبٍ ما كان جالك غير لا صرت معشوق

قالت انت أول وصالي وانت فالهجر الاخير

وأخرى ما هو بجايك باسبقه لو هو سبوق

قلت ضيفتك شعوري واغتذيتي كل خير

واهبك كلي وانا اللي من عرفتيني صدوق

قالت اعطيتك سمايه ماعدا طيرك يطير

وان مللت الجو حوِّل مسكنك في جوف موق

قلت سكنتك فؤادي / قالت الموطن صغير

قلت اعطيتك عروقي / قالت اشبه بالبروق

قلت صغر القلب حجمه لكن احيا له كبير

يفتنك ويذل غيرك ولا تهان له حقوق

والبروق اللي بجوفي فجَّرت مليون بير

شفتك اكثر من وردها ليه اقوالك تبوق

قالت اعذرني حبيبي دوم زلاتي تصير

قلت محشومه حياتي ما اشوفك غير ذوق