أكتب بيوت الشعر في وسط قرطاس
في ليثنا المحبوب محلا مسيره
هذا الأولمبي شرّف الكل بالكاس
شبابنا معروف ما فيه غيره
ما هوب من يلعب ويطلع بالافلاس
محبته للكل في كل ديره
الليث يزأر ثمّ ينذر بالأجراس
بهجومه الناري تسمع زئيره
خلفه رجال عندها شعور وإحساس
رجال على الطولات دايم شهيره
فيهم أبو فيصل على العين والراس
خالد بن سلطان فضوله كثيره
معزّته بقلوبنا مالها قياس
شهم ولد شهم الله يجيره
وخالد البلطان لليث نوماس
أبو الوليد الفذ بحكمه يديره
وخالد بن معمّر حكيم ونبراس
أبو محمد والوفاء هو يسيره
واليوم يكرم ناس من خيرة الناس
فيه أبو حامد والنويصر جديره
واللاعبين اللي عديمين الأجناس
جماعة للعز فخر وقديره
فيه الهجوم اتعب دفاع وحراس
يمطر على المرمى أهداف كثيره
فيه الوسط يا ما كتم كل الأنفاس
يوزع الباصات بفكر وبصيره
فيه الدفاع الصلب قوة على أساس
الخصم لا مره دروبه عسيره
وجمهوره اللي بالفخر ماله قياس
متواجد في كل انحاء الجزيره
وصلاة ربي عدّ ما هب نسناس
عدّ الحجيج اللي لفوا للشعيره
الشاعر - محمد بن عبدالعزيز الخنيفر
