يا مرحبا يا حبيب زارني طيفه
شفته بنومي وشفت الشوق بعيونه
جتني تخطى وبين الأمن والخيفه
وخطاه للشوق بالاحلام مرهونه
بدر تتوه القوافي في تواصيفه
نوره بعيني وقلبي يعزف الحونه
يا نور قلبي ويا زرعه ويا ريفه
بوصا لكم زرع قلبي تورق أغصونه
وردٍ تجلّى عن الثغر ومراهيفه
عذب السحاب القراح بعالي امزونه
وامشي على شاطي اليم وعلى سيفه
واحلم بدانة بحر والموج من دونه
ويجيبها الحلم في لنش ومجاديفه
ويبدي شعاع الشفق شقرٍ على امتونه
واشوفها وصف عبلى وعنتر وسيفه
واعيش نشوة نصر والروح ممنونه
وتبدي لي الصبح في عالي مشاريفه
ويضوي بها الليل في دربي على هونه
ويصفى لي الوقت واخشى من صواديفه
واعيش لحظة وفا بالود مشحونه
وأصدق الحلم وأصحي من خطا زيفه
حلمٍ يعيد الزمن ما تصدق اظنونه
