يا عاشق الدنيا ترى ما لها جار
كم واحد في حبها طار شوعه
خلك على صكات الايام صبار
ويوم يفوتك لاتمنى رجوعه
اقفى على ما فيه من خير واشرار
نجم هوى ما يندرى عن طلوعه
وما هي على كيفك تمنى وتختار
ابعد على المخلوق من حب كوعه
رشيد الزلامي
يالله يالي تغسل الأرض بالسيل
تغسل قلوب أهل الحسد من حسدها
وترد كيد أهل القلوب المغاليل
بنحورها وأعنا الوجود تحصدها
وأجعل لنا من باب يسرك تساهيل
مدات جودك نستمد بمددها
بارك لنا بالمد والصاع والكيل
ونفوسنا عطها القناعة وزدها
خلف بن هذال
المجامل بعض الأحيان ما يقضي لزوم
قاضب النفس الضعيفه ولاهو قدها
ياعيال آدم وحواء تراها ما تدوم
دورة الأيام لابدها لابدها
جعل قسمي عند ربي من خيار القسوم
واحدٍ يعط العطايا ولا يرتدها
سلطان الهاجري
